(Մեդիսոն) Վիսկոնսինի նահանգային Հանրային պաշտպանի գրասենյակը իր փորձն է կիսում Հայաստանի հանրային պաշտպանության համակարգի զարգացման նպատակով: Վիսկոնսինի Հանրային պաշտպանի գրասենյակը շարունակում է այլ երկրներում և այլ իրավական համակարգերում գործող հանրային պաշտպաններին աջակցության իր բարի ավանդույթը: Հարկ է նշել, որ այս գործունեությունը ֆինանսավորվում է Պետդեպարտամենտի Թմրամիջոցների դեմ պայքարի և իրավապահ համագործակցության (ԹՊԻՀ) բյուրոյի կողմից:
Հուլիսին կայացած մեկշաբաթյա նախնական այցելությունը Վիսկոնսինի Հանրային պաշտպանի ներկայացուցիչներին հնարավորություն տվեց հենց տեղում ծանոթանալ Հայաստանի հանրային պաշտպանության համակարգին: Այցելության արդյունքում վերհանված կարիքների հիման վրա այս տարի ավելի ուշ և 2018թ. ընթացքում կլինեն դասընթացներ և մենթորական նախաձեռնություններ:
Վիսկոնսինի Հանրային պաշտպան Քելի Թոմսոնը, խոսելով այս նախաձեռնության մասին, նշեց. «Մենք շատ ուրախ ենք աջակցելու փաստաբանական այլ համակարգերին՝ այս անգամ արդեն Հայաստանում: Այլ երկրներում և իրավահամակարգերում նման ծրագրերի իրականացմամբ մենք ներկայացնում ենք օրենքի գերակայության և անաչառ ու հավասարակշռված արդարադատության համակարգի ապահովման հարցում Վիսկոնսինի փորձն ու ձեռքբերումները»:
Այս մեկշաբաթյա խորհրդատվական այցելությանը մասնակցեցին Վիսկոնսինի նահանգային Հանրային պաշտպանի տեղակալ Մայք Թոբինը, ուսումնական ծրագրերի տնօրեն Ջինա Պրուսկին և իրավական ծրագրերի պատասխանատու Ադամ Պլոտկինը: Երեք հոգանոց առաքելության եզրահանգումների հիման վրա որոշում կկայացվի դասընթացների կամ մենթորինգի փուլերում Վիսկոնսինի նահանգային Հանրային պաշտպանի գրասենյակի հավելյալ աշխատակիցների ներգրավման վերաբերյալ:
Այս ծրագիրը Վիսկոնսինի Հանրային պաշտպանի գրասենյակի բարի ավանդույթների շարունակությունն է, այն է՝ աջակցել հանրային պաշտպանության համակարգերին երկրի ներսում և միջազգայնորեն, որի շրջանակում աշխատանքներ են իրականացվել Իսրայելում, Ճապոնիայում, Միչիգանում և Նյու Օրլեանում: Այս հղումում ծանոթացեք Պետդեպարտամենտի ԹՊԻՀ Բյուրոյի աշխատանքներին՝ ուղղված միջազգային հանցավորության դեմ պայքարին և օրենքի գերակայության ամրապնդմանը:
