Զանգվածային ոչնչացման զենքի դեմ պայքարի ոլորտում համագործակցության ծրագրի շրջանակներում անցկացվեց «ՔԿՃՄ ազդեցության հետեւանքով խոցվածների բժշկական օգնության կառավարում» դասընթացը
2023 թ․-ի մարտի 2-10-ը ԱՄՆ Պաշտպանության դեպարտամենտի Վտանգների նվազեցման գործակալության (ՊՎՆԳ) Զանգվածային ոչնչացման զենքի դեմ պայքարի ոլորտում համագործակցության ծրագրի փորձագետները Ներքին գործերի նախարարության (ՆԳՆ) Լուսակերտի ուսումնական կենտրոնում անցկացրեցին վեցօրյա դասընթաց՝ քիմիական, կենսաբանական, ճառագայթային և միջուկային (ՔԿՃՄ) ազդեցության հետևանքով խոցվածների բժշկական օգնության կառավարման վերաբերյալ։ Դասընթացն անցկացվեց ՆԳՆ-ի փրկարար ծառայության 24 աշխատակցի համար։
Դասընթացի նպատակն էր փոխանցել գիտելիքներ և հմտություններ՝ քիմիական և կենսաբանական սպառնալիքի գործոնները նույնականացնելու, քիմիական և կենսաբանական գործոնների հետևանքով խոցվածներին կառավարելու և արտակարգ իրավիճակներում կյանքի համար անհրաժեշտ հիմնական օգնություն ցուցաբերելու վերաբերյալ։ Տեսական մասից բացի, դասընթացը բաղկացած էր նաև զանգվածային խոցվածների սցենարի վրա հիմնված գործնական բաղադրիչից։ Սցենարի համար ՆԳՆ-ից լրացուցիչ 15 կամավորներ էին ընդգրկվել։ Գործնական վարժանքը հնարավորություն տվեց մասնակիցներին կիրառել անձնական պաշտպանության, տրիաժի (տեսակավորման), բուժման և քիմիական գործոնից խոցվածների ախտահանման սկզբունքները՝ օգտագործելով ՊՎՆԳ-ի կողմից տրամադրված ուսումնական հավաքածուները և սարքավորումները։
