Քրիստինա Քվինը ԱՄՆ բարձրագույն դիվանագիտական կորպուսի կադրային ծառայող է՝ նախարար-խորհրդականի դիվանագիտական աստիճանով: Դեսպան Քվինը Երևան է ժամանել 2023թ․փետրվարի 16-ին։ Նա Միացյալ Նահանգների 10-րդ դեսպանն է Հայաստանում։

Դեսպան Քվինը շուրջ երեք տասնամյակ հանրային ծառայության ոլորտում է։ Զբաղվել է Միացյալ Նահանգների ու Եվրոպայի միջև հարաբերությունների խորացման և ամբողջական, ազատ ու խաղաղ Եվրոպայի տեսլականի առաջ մղման հարցերով։  Մինչ Հայաստան ժամանելը դեսպան Քվինը (2020-2022թթ.) եղել է ԱՄՆ գործերի ժամանակավոր հավատարմատարը Ուկրաինայում։

Ավելի վաղ Կիևի ԱՄՆ դեսպանությունում նա ծառայել է  որպես փոխդեսպան, Փարիզի ԱՄՆ դեսպանությունում՝ տնտեսական հարցերով նախարար-խորհրդական, Բանգկոկի ԱՄՆ դեսպանությունում՝  փոխդեսպանի պաշտոնակատար և տնտեսական հարցերով խորհրդական, Լոնդոնի ԱՄՆ դեսպանությունում՝ տնտեսական հարցերով խորհրդական, Ազգային անվտանգության խորհրդի նախագահական գործադիր գրասենյակում՝ ԵՄ-ի, Ուկրաինայի և Բելառուսի բաժնի ղեկավար։ Դեսպան Քվինը նաև աշխատել է Մոսկվայի ԱՄՆ դեսպանությունում, Բրյուսելում՝ Եվրամիության ԱՄՆ առաքելությունում, Մանիլայի ԱՄՆ դեսպանությունում, իսկ մայրաքաղաք Վաշինգտոնում նա զբաղվել է Եվրամիության և Սլովենիայի հետ երկկողմ հարաբերությունների հարցերով։

Դեսպան Քվինը ծնունդով Կալիֆորնիայի նահանգից է, ուսանել է Օքսիդենթալ քոլեջում՝ ստանալով բակալավրի աստիճան, ապա ռազմավարական հետազոտությունների մագիստրոսի կոչում է ստացել ԱՄՆ ցամաքային ուժերի պատերազմի քոլեջում: