Դեկտեմբերի 2-5–ը Հայաստանի Գյուղատնտեսության նախարարության, Առողջապահության նախարարության, Արտակարգ իրավիճակների նախարարության և Ազգային անվտանգության ծառայության ներկայացուցիչները մասնակցեցին Անդրկովկասում արտակարգ դեպքերի դիմակայությանն ուղղված գործողությունների մշակման վերաբերյալ վարժանք սեմինարին, որն անցկացվեց Վրաստանի Թբիլիսի քաղաքում՝ ԱՄՆ Պաշտպանության դեպարտամենտի Սպառնալիքների նվազեցման գործակալության հովանավորությամբ:  Վրաստանի կառավարությունը հյուրընկալեց այդ վարժանքը, որը շեշտը դնում էր նորահայտ ախտածինների և անդրսահմանային հիվանդությունների սպառնալիքների նկատմամբ միջգերատեսչական և միջազգային արձագանքման կարևորության վրա: Վարժանքի նպատակն էր խթանել տարածաշրջանային համագործակցությունը կենսաբանական հսկողության, հաղորդակցության և աղետներին արձագանքման բնագավառում՝ արձագանքման կարողությունները և հիվանդությունների սպառնալիքների դիմակայությունն ամրապնդելու նպատակով:

Վարժանքն անցկացնողները ներկայացրեցին նախապես մշակված սցենարներ, որոնց միջոցով ուսումնասիրվում էին հրավիրված բանախոսների՝ կենսաբանական միջադեպերի արձագանքմանը վերաբերող զեկույցներում ընդգրկված վճռորոշ հարցերը: Վարժանքին մասնակցում էին Վրաստանի և Ադրբեջանի ներկայացուցիչներ, ինչպես նաև դիտորդներ Թուրքիայից, Մոլդովայից, Ուկրաինայից, Մեծ Բրիտանիայից և մի շարք ԱՄՆ գործակալություններից: Յուրաքանչյուր շահառու որոշակի գործառույթ էր կատարում վարժանքի շրջանակներում, նպաստելով վերջինիս արդյունավետ իրականացմանը: Քննարկման ենթակա այլ թեմաներն էին՝

• Բռնկումների հայտնաբերում, ախտածինների տարբերակում և հիմնական նախարարությունների կողմից արձագանք
• Միջազգային արձագանք, անդրսահմանային հաղորդակցություն, սահմանային վերահսկման ռեսուրսների փոխանակում, օրենքի հարկադրում և պատրաստականություն
• ԶԼՄ-ների ներգրավում, ռիսկերի հաղորդակցում, կարանտինի ընթացակարգեր
• Բնակության տարհանում, վարակազերծում, վտանգավոր նյութերի վերացում
• Հետագա բազմազգային համագործակցության հնարավորություններ

Հեղինակ U.S. Mission Armenia | 11 Դեկտեմբերի, 2014 | Կատեգորիաներ: Լուրեր