Երեխայի ծնունդ

 

Ուշադրություն Եթե առցանց հերթագրվել եք վիզայի հետ կապված հարց քննարկելու համար, ապա անձնակազմն այդ հարցում ձեզ չի կարող օգնել։ Վիզաներին առնչվող բոլոր հարցերի դեպքում պատասխանը պետք է փնտրել Visa Navigator-ում։

Որպես ԱՄՆ քաղաքացի արտերկրում ծնված ձեր երեխայի ծննդյան մասին դուք պետք է հնարավորինս շուտ հայտնեք ԱՄՆ դեսպանատանը, որպեսզի ապահովվի պաշտոնական գրանցում, որով երեխան կկարողանա ԱՄՆ քաղաքացիություն ստանալ։ Արտերկրում ծնված երեխայի ծննդյան հյուպատոսական վկայականի դիմումը պետք է ներկայացվի մինչև երեխայի 18 տարին լրանալը։

 

Արտերկրում ծնված երեխայի ծննդյան հյուպատոսական վկայականի տրամադրման դիմում

Արտերկրում ծնված երեխայի ծննդյան հյուպատոսական վկայական տրամադրվում է այն դեպքում, երբ երեխայի ծննդյան պահին ծնողներից գոնե մեկը ԱՄՆ քաղաքացի է կամ ԱՄՆ քաղաքացիություն չունեցող մշտական բնակիչ։

Եթե դուք կամ ձեր կինը/ամուսինը արտերկրում ծնված երեխայի կենսաբանական ծնողն եք, դուք պետք է անձամբ ներկայանաք Երևանում ԱՄՆ դեսպանատուն՝ հարցազրույցի համար։

Արտերկրում ծնված երեխայի ծննդյան հյուպատոսական վկայականի համար դիմելիս կան վճարման  հետևյալ տարբերակները․

1․ Առցանց վճարում՝ օգտագործելով միջազգային վճարային դեբետային/կրեդիտային քարտ կամ ուղղակի վճարում ԱՄՆ դոլարով վարվող բանկային հաշվից (հայտնի է նաև որպես “ACH”)

2․ Առձեռն վճարում՝ Երևանի ԱՄՆ դեսպանատանը կանխիկով։

 

Դեսպանատան հյուպատոսական բաժին պետք է ներկայանան երկու ծնողը և երեխան։

ԱՄՆ օրենսդրության համապատասխան հոդվածների համաձայն երեխայի քաղաքացիությունը սահմանելու համար պահանջվող փաստաթղթերի ցանկը ներկայացվում է ստորև։

Ուշադրություն ցանկացած հիմնավորող փաստաթուղթ, որն անգլերենով չի տրված, պետք է ունենա անգլերեն թարգմանություն՝ հաստատումով։ Եթե չեք կարող առցանց դիմել, ապա պետք է թղթային տարբերակով ներկայացնել դիմումի DS-2029 լրացված ձևը։

  • Երեխայի ծննդյան վկայականի բնօրինակ․
  • Երեխայի ծնողների ԱՄՆ քաղաքացիությունը հաստատող փաստաթղթեր, օրինակ՝ ծննդյան վկայականի բնօրինակ (կամ հաստատված պատճեն), ընթացիկ ԱՄՆ անձնագիր կամ ԱՄՆ քաղաքացիության շնորհման վկայական․
  • Ծնողների ամուսնության վկայական (եթե կիրառելի է)․
  • Ամուսնալուծության վկայական, եթե ծնողներից որևէ մեկն ամուսնալուծված է․
  • Եթե ծնողներից միայն մեկն է ԱՄՆ քաղաքացի, ապա պետք է ԱՄՆ-ում ապրելու կամ ֆիզիկապես գտնվելու ապացույցներ ներկայացվեն․ ծնողը պետք է կարողանա ներկայացնել նախքան երեխայի ծնունդն առնվազն 5 տարի Միացյալ Նահանգներում բնակության ապացույց, ընդ որում այդ 5 տարուց առնվազն 2-ը պետք է լինի 14 տարին լրանալուց հետո։ Այդպիսի ապացույց է համարվում օրինակ՝ ավագ դպրոցի կամ քոլեջի ավարտական վկայականի բնօրինակը, անձնագրում տեղ գտած դրոշմակնիքները, որոնք ցույց են տալիս ԱՄՆ-ում տևական ժամանակ գտնելու ժամանակահատվածները․ հարկային փաստաթղթերը կամ աշխատավարձային վճարումներն առանձին վերցրած չեն կարող համարվել բավարար ապացույց Միացյալ Նահանգներում ապրելու կամ ֆիզիկապես գտնվելու վերաբերյալ․
  • Եթե երեխան ծնվել է նախքան 2017թ․ հունիսի 12-ը և մայրը միայնակ է, ապա ԱՄՆ քաղաքացի միայնակ մայրը պետք է ապացույց ներկայացնի նախքան երեխայի ծնունդը ԱՄՆ-ում 1 տարի անընդմեջ ապրելու/ֆիզիկապես գտնվելու վերաբերյալ․
  • Արտերկրում ծնված երեխայի ծննդյան հյուպատոսական վկայականի տրամադրման լրացված  DS-2029 դիմումը
  • Սպասարկման վճար 100 ԱՄՆ դոլար կամ համարժեք ՀՀ դրամ՝ կանխիկով։

Արտերկրում ծնված երեխայի ծննդյան հյուպատոսական վկայականը տրվում է երեխայի ԱՄՆ քաղաքացիության հիմքերն հաստատելուն պես։ Այս վկայականը փաստում է երեխայի քաղաքացիությունը և տրվում է ԱՄՆ-ում տրվող ծննդյան վկայականի փոխարեն։

Այլ կարևոր տեղեկություններ

Եթե միաժամանակ դիմում եք նաև երեխային անձնագիր տրամադրելու հարցով, ապա պետք է ունենաք նաև հետևյալ փաստաթղթերը․

  • Անձնագրային դիմումի DS-11 ձևը.
    • Դիմումի յուրաքանչյուր էջ պետք է տպված լինի առանձին թղթի վրա (տպված օրինակի առաջին էջի վերևի ձախակողմյան անկյունում պետք է QR կոդ լինի).
  • 2 հատ ճիշտ չափսերով կտրած 2″x2″ (5×5 սմ) լուսանկար ամեն դիմողի համար.
  • Կանխիկ գումար՝ ճիշտ այնքան, ինչքան նախատեսված միջնորդավճարն է․
  • Ուղեկցող փաստաթղթեր՝  բնօրինակ և պատճեն (այդ թվում՝ անձնագրերի կենսաչափական տվյալների էջի պատճենը)։



Ինչպես դիմել
Արտերկրում ծնված երեխայի ծննդյան հյուպատոսական վկայականի համար դիմումները դեպքերի գերակշիռ մասում ընդունվում են առցանց։ Առցանց դիմելու համար պահանջվում է․
1. Արտերկրում ծնված երեխայի ծննդյան հյուպատոսական վկայականի համար առցանց դիմելիս պետք է օգտահաշիվ բացել MyTravelGov-ում։ MyTravelGov-ը ապահով և տվյալների պաշտպանության լծակներով հարթակ է։ Օգտահաշիվ բացելու քայլերին մանրամասնորեն կարող եք ծանոթանալով՝ դիտելով այս տեսանյութը (https://www.youtube.com/watch?v=n_8DmVyZruY)։
2. MyTravelGov-ում օգտահաշիվ բացելուց հետո ձեզ հասանելի կլինի Արտերկրում ծնված երեխայի ծննդյան հյուպատոսական վկայական դիմումի էլեկտրոնային տարբերակը։ Դիմումը շատ պարզ է և առցանց ներկայացված են լրացման քայլ-առ-քայլ ցուցումներ։ Անհրաժեշտ փաստաթղթերի ցանկին խորհուրդ ենք տալիս ծանոթանալ նախապես և դիմումը լրացնելիս դրանք պատրաստի ունենալ։
3. Առցանց դիմումը լրացնելուց և վճարումն առցանց կատարելուց հետո, մենք կկապնվենք ձեզ հետ։ Դիմումը կակտիվանա վճարումը կատարելուց հետո 72 ժամ անց։ Լրացուցիչ տեղեկություն ստանալու համար,կարող եք կապնվել մեզ հետ էլեկտրոնային փոստի միջոցով՝acsyerevan@state․gov․
Ուշադրություն․ Դեսպանատանը պետք չէ կատարել Արտերկրում ծնված երեխայի ծննդյան հյուպատոսական վկայականի համար նախատեսվող 100 ԱՄՆ դոլարի ևս մեկ կամ կրկնակի վճարում։
4. Ներկայացեք հարցազրույցին անձամբ՝ ձեզ հետ ունենալով բոլոր փաստաթղթերի բնօրինակները և 1-ական պատճեն (տպված թղթի միայն մի կողմում)։ Դիմումը քննության առնելուց հետո բնօրինակ փաստաթղթերը կվերադարձվեն։ Ցանկացած փաստաթուղթ, որն անգլերենով չի տրված, պետք է ունենա անգլերեն թարգմանություն։ Ներկա պետք է լինի նաև երեխան։

Վերարտադրողական օժանդակ տեխնոլոգիաների կիրառմամբ դեպքեր
Վերարտադրողական օժանդակ տեխնոլոգիաների՝ փոխնակ մոր, արտամարմնային բեղմնավորման կամ այլ տեխնոլոգիաների կիրառման պարագայում անհրաժեշտ է անպայման ունենալ ԱՄՆ քաղաքացի ծնողի հետ երեխայի գենետիկ կապը հաստատող հիմքեր։
Այդպիսի հիմք կարող է դիտարկվել օրինակ՝ պտղաբերության կենտրոնի/կլինիկայի հետ պայմանագիրը, որտեղ հստակ նշվում է, թե ում է պատկանում գործընթացում կիրառված գենետիկ նյութը և նկարագրում է միջամտությունների ընթացքը՝ ձվաբջիջներ և սերմանբջիջներ վերցնելը, բեղմնավորումը, սաղմի իմպլանտացիան, ինչպես նաև գործընթացի վերաբերյալ այլ բժշկական փաստաթղթեր։
Հավելյալ կարելի է նաև ներկայացնել փոխնակ մոր հետ պայմանագիրը, գենետիկ նյութի սառեցման կամ պահեստավորման փաստաթղթերը, հիվանդանոցային տեղեկանքներ, տարբեր միջամտությունների դիմաց կատարված վճարումների ստացականները և այլ փաստաթղթեր, որոնք կարող են պահանջվել հյուպատոսական պաշտոնյայի կողմից։
Նկատի ունեցեք, որ վերարտադրողական օժանդակ տեխնոլոգիաների կիրառման պարագայում հնարավոր է ԴՆԹ թեստ պահանջվի։ Եթե հարցազրույցի ժամանակ ներկայացվող փաստաթղթերով հնարավոր չի լինում հստակեցնել ծնողի և երեխայի ազգակցական կապը, ապա խորհուրդ է տրվում ԴՆԹ թեստ հանձնել։ ԴՆԹ թեստը կենսաբանական թեստավորման միակ մեթոդն է, որն այս պահին ԱՄՆ պետքարտուղարությունը համարում է կենսաբանական կապը հաստատող ընդունելի ապացույց։ Նկատի ունեցեք, որ այս թեստավորումը բացառապես կամավոր հիմունքներով է իրականացվում և դրա հետ կապված բոլոր ծախսերը դիմողն հոգում է անձամբ, իսկ լաբորատորիային վճարում է նախապես։ Թեստավորմանը համաձայնելը դեռ անձնագրի թողարկման կամ արտերկրում ծնված երեխայի ծննդյան հյուպատոսական վկայականի տրամադրման երաշխիք չէ։ Վերարտադրողական օժանդակ տեխնոլոգիաների կիրառմամբ դեպքերի հետ կապված առավել մանրամասն տեղեկությունների ու հարցազրույցին նախապատրաստվելու համար կարող եք ընթերցել հետևյալ նյութը՝ https://travel.state.gov/content/travel/en/legal/travel-legal-considerations/us-citizenship/Assisted-Reproductive-Technology-ART-Surrogacy-Abroad.html։